KONGO: Erupcija na drugom vulkanu

Drugi vulkan aktivirao se danas na istoku Demokratske Republike Kongo nedaleko od vulkana Njiragongo posle čije erupcije prošle nedjelje je stradalo najmanje 34 ljudi.

Vulkan Murara nalazi se u nenaseljenom dijelu parka Virunga, i mali je vulkan, a kongoansko ministarstvo komunikacija saopštilo je da je ova vulkanska erupcija slabog intenziteta i da se nalazi u nenaseljenoj zoni.

“Vulkanska erupcija slabog intenziteta prijavljena je danas na sjevernoj strani Njamuragire. Lava teče u nenaseljenoj zoni u parku Virungas”, navelo je ministarstvo.

Vulkan Murara nalazi se na oko 25 kilometara od grada Gome. Region Gome je mjesto gdje je intenzivna vulkanska aktivnost, tu se nalazi šest vulkana gdje su najveći Njiragongo i Njamuragira, na visini od 3.470 odnosno 3.058 metara.

Lava iz vulkana Njiragongo direktno prijeti gradu Gomi, glavnom gradu provincije Sjeverni Kivu koji je izgrađen direktno u podnožju vulkana na obali jezera Kivu. Taj vulkan se bez upozorenja aktivirao prošle subote. U toj erupciji stradalo je najmanje 34 ljudi, a između 900 i 2.500 kuća je uništeno.

Ogromne količine lave izbačene su iz vulkana, a jedan tok je stigao do sjeveroistočnog predgrađa Gome.

Vlasti su u četvrtak zbog rizika od nove erupcije, i mogućeg dolaska lave do grada naredile evakuaciju grada na najmanje dvije nedjelje.