VAPAJ GRAĐANA IZ OKOLINE ZIKS-A: Gospodo, utišajte ometače, nijesmo svi u zatvoru!

Medijski napisi o tome da su građani desetina mjesta u okolini spuškog zatvore onemogućena da komuniciraju telefonom ili da koriste internet, očito nijesu stigli do uprave ZIKS-a. Ili su, naprosto, bili kratkog daha.

Ni na dva-tri kilometra vazdušne linije od zatvora u Spužu, signala i interneta  nema, a ljudi su ogorčeni.

Slavka iz Pričelja kaže za naš portal da su telefonski razgovori sa prijateljima i rodbinom pravo mučenje:

-Čuju me svaku treću riječ. Šetam po dvorištu, očajnički tražim mjesto gdje je domet malo bolji. Ne uspijava mi uvijek. Ovo se pretvara u noćnu moru.

I Nebojša iz Donjih šuma je ogorčen:

-Zatvor je daleko odavde, ali ometači djeluju. Radim od kuće, internet mi je prespor. Komunikacija sa ljudima nemoguća. Podnijeću tužbu protiv ZIKS-a, jer zbog njihovih ometača imam veliku šansu da izgubim posao. Koji poslodavac će da me trpi kada u 21. godini novog mijenijuma nijesam u prilici da kominiciram kao sav normalan svijet?

I drugi mještani sa kojima smo razgovarali su ogorčeni zbog, kako ih zovu, “američkih ometača”. Gotovo uglas žele poručiti upravi ZIKS-a:

-Gospodo, nijesmo svi zatvorenici, mada se po vašim postupcima čini da jesmo. A možda je ona izjava Momira Bulatovića iz vremena sankcija, kada je rekao da je “Crna Gora najljepši zatvor na svijetu” – još aktuelna?!