ZOGOVIĆ: Lideri DF-a su svojim životima garantovali pobjedu protiv režima i sad mafija i DPS ne žele da oni uđu u Vladu

Predsjednik Administrativnog odbora i poslanik Demokratskog fronta u Skupštini Milun Zogović kazao je za “BORBU” da je neprihvatljivo bilo čije osporavanje ulaska lidera Demokratske narodne partije Milana Kneževića u Vladu i da će taj odnos drugih prema DF-u biti njihova smjernica u odnosu prema njima ali i prema sadašnjoj ili rekonstruisanoj Vladi.

“Uznemirenost DPS-a zbog izvjesnog ulaska DF-a u Vladu potpuno je opravdana i očekivana. DPS dobro zna ko ima i snage i smjelosti da udje u rat sa organiziovanim kriminalom, korupcijom i svim drugim pošastima koje su decenijama upropaštavale naše društvo. To je upravo onaj momenat kada počinje sravnavanje računa sa pravnom državom, zato se na pomen rekonstrukcije i ulaska lidera DF-a u vladu pali crveni alarm kod svih onih koji su funkcionisali po sopstvenim pravilima i za koje je zakon bio mrtvo slovo na papiru”, smatra on.

Zogović ističe da su međusobno uvažavanje koalicionih partnera, jasni ciljevi a prije svega dobre namjere, ključni preduslovi za uspjeh  pregovaračkog procesa unutar parlamentarne većine. Na tim temeljima brzo i lako ćemo doći do ozbiljne i stabilne vlasti sa neupitnom političkom podrškom.

“Vrijeme iza nas jasno je pokazalo da se izigravanjem demokratskih standarda i obesmišljavanjem izbornih procesa ne može do ozbiljnih rezultata i stabilne vlasti. Koncept da se može vladati bez podrške onih koje su građani na izborima birali da ih predstavljaju jednako je nerealan i neodrživ. Zavaravanje je da se konstrukciona greška tog koncepta može nadomjestiti političkim ucjenama jer je ucjena prije svega najgori i najprizemniji vid ljudske a zatim i političke komunikacije. Posebno je iluzorno zanositi se da se sa Demokratskom narodnom partijom i sa Demokratskim frontom, sa ljudima koji su svojim životima svjedočili  svoju politiku može razgovarati jezikom ucjene i uslovljavanja. Nastao na ideji oslobođenja Crne Gore od političkog krila mafije, od Đukanovićeve diktatorske čizme, DF je uvijek prezirao sitne računice, kalkulanstvo, foteljašenje jer su sloboda, ravnopravnost i pravna država bili i ostali ciljevi za koje se borimo. Upravo snaga tih velikih ideja i čelični karakter lidera, funkcionera i članova DF nadživjeli su sve režimske progone i torture a 30. avgusta 2020. godine stigla je potvrda da je vrijedjelo imati kičmu i boriti se protiv nepravde, baš onako frointovski bez odustajanja i bez predaje”, precizirao je Zogović.

On je istakao da se u abnormalnom postizbornom ciklusu DF-u želi nametnuti kao normalnost da se izborio za slobodu za sve osim za sebe i da jedno od osnovnih načela DF-a „sva prava svima“ ne važi jedino za lidere, funkcionere, članove, simpatizere i glasče Demokratskog fronta. Da ne govorimo o nedostatku moralnog, ljudskog i političkog uporišta onih koji su dali sebi za pravo da licitiraju ko iz našeg saveza može a ko ne može biti član vlade. Kao da građani o tome nijesu dali svoj sud na izborima.

“Poruke takvog sadržaja su pokušaj unižavanja i ponižavanja svih članova, funkcionera, simpatizera i glasača jer je to zapravo neprijateljski odnos prema politici DF-a koja je dominantno doprinijela promjenama a ne prema našim liderima. Licitiranje sa potencijalnim prihvatljivim zamjenama je nedobronamjerno zamajavanje jer ako nisu prihvatljivi funkcionalni prestavnici datih politika kako mogu biti prihvatljivi njihovi podržavaoci i sledbenici”, kazao je Zogović.

On smatra da bi neulazak lidera političkih partija u Vladu bio nastavak teatra političkih apsurda.

“I to nije nikakva glad za funkcijama, kako to definišu oni koji su se neočekivano i neopravdano  dohvatili fotelja i funkcija, nego potreba političke stabilnosti i vlade koja će biti potentna da se suoči sa svim izazovima pred kojima se nalazi Crna Gora kao i garant njenog evropskog kursa. Neprihvatljivo je da bilo ko dovodi u pitanje i osporava ulazak Milana Kneževića u Vladu Crne Gore a ako bude takvih neprimjerenih tonova prirodno je da odnos drugih prema nama opredeljuje i naš odnos oko same podrške vladi. Nesporno je pravo svih političkih  subjekata pa i DNP-a i DF-a da autonomno kadriraju u svojim partijama. A o tome da li Milan Knežević i drugi lidera DF-a treba da bude članovi Vlade  odlučili su građani na izborima i svaka druga testiranja i porovjere potpuno su irelevantni. Podle poruke da ne mogu lideri a da mogu neki drugi pokazuju i elementarno nepoznavanje funkcionisanja političkog sistema”, precizirao je Zogović.

On je siguran da na takvu “prodaju roga za svijeću” ne bi pristao ni jedan funkcioner DF-a a da ne govorimo o stranačkim organima čija bi uloga i postojanje na taj način bili potpuno obesmišljeni.

“Sada kada smo dobili i zvanične potvrde da je opstrukcija participacije DF-a u izvršnoj vlasti proizvod domaćih kuhinja za unutrašnju upotrebu otimanja vlasti i rušenja izborne volje građana, potpuno su jasne dimenzije prevare koju je nametnula i iza koje stoji druga familija. Pristanak na opstanak takvog koncepta bila bi izdaja naših birača a mi na to nemamo pravo”, zaključio je Zogović u izjavi za “BORBU”.